“SI JONAS AT SI YAHWEH”

“SI JONAS AT SI YAHWEH”

Isang Pagninilay sa Aklat ni Jonas sa Pamamagitan ng Maikling Dula

Ni: Jeric C. Cortado, December 2006

SCENE 1: Creation to Conflict (Malikhaing Galaw)

SCENE 2: Si Jonas at si Yahweh nag-uusap patungkol sa Ninive. Si Jonas ay sinugo ni Yahweh.

ONSTAGE

Yahweh            : Jonas….Jonas…. Ikaw ay magaling, masunurin, at matapat na lingkod.

Jonas               : Aba siyempre Yahweh… Kahit saan mo ako susuguin…pupunta ako.

  Anuman ang iyong ipag-uutos susunod ako.

Yahweh            : Yan ang gusto ko sa yo Jonas….

Jonas               : Ako pa! Susunod ako Yahweh.

Yahweh            : Kahit saan?

Jonas               : Oo!

Yahweh            : Nakita ko ang kanilang kalagayan….nahihirapan at lugmok sa

  kasamaan. Walang tumutulong sa kanila upang mabago at lumaya.

Jonas               : Aba!  Dapat lamang silang tulungan Yahweh. Kaya….

Yahweh            : Kaya pumunta ka sa Ninive….

Jonas               : Aba! Kahit saan…. Wag lang sa Ninive!

Yahweh            : Libo-libong mga naroroon na walang kamalay-malay sa kanilang

  pagkawasak.

Jonas               : Sila ay dapat lang na magunaw! Karapat-dapat nilang maranasan ang

pagkawasak sa kanilang kasamaan! Sariwa pa sa aking isipan   ang pagsasamantala, ang kahirapang idinulot sa aming bayan. Marami sa amin ang nawalan ng ama, ng ina, ng anak dahil sa kanilang kalupitan noong sinakop kami. Marami sa amin ang kanilang binihag at inalipin.

Yahweh            : Sila mandin sa kasalukuyan ay nakakaranas ng paghihirap. Marami din 

  sa kanila ang mga uring pinagsasamantalahan. At inaalipin sa sarili

  nilang  bayan. Kailangan silang ugnayan at samahan.

Jonas               : Nakakalito ka Yahweh….hindi kita maintindihan!

Yahweh            : Hindi mo ako naiintindihan dahil galit ang nasa puso mo. Hindi simpleng

  bayan ang pinag-uusapan dito Jonas! Kundi uri (tatahimik) na bagamat

  marami sa  bilang ay inaalipin at pinagsasamantalahan ng iilan.

Jonas               : (natahimik sa Jonas) O sige…sige. Ikaw naman ang laging tama eh.

                          Pupunta ako. Dahil alam ko naman…hindi rin sila magbabago.

                          Sinasayang ko lang ang panahon ko doon.. Dapat lang silang magunaw.

Yahweh            : Ano yong sinabi mo?

Jonas               : Hehehe….wala po Yahweh. Sige po Yahweh aalis na ako….   

   (aalis si Jonas sa patakas sa direksyon ng Tarsis. Subalit ito ay napuna

   ni Yaweh)

Yahweh            : Hindi diyan ang daan patungong Ninive Jonas…. Pa Tarsis yan… dito

  ang patungong Ninive.

Jonas               : Aw! Oo nga….Sabi ko nga po…diyan eh.

EXIT

SCENE 3: Sa daan patungong Tarsis….

ONSTAGE

Papasok sa lower right stage si Jonas…lingon ng lingon na tila may pinagtataguan at may humahabol ang tingin sa kanya…makakatagpo niya sa center left ng mga taong patungong Tarsis.

Jonas               : Dito po ba ang daan patungong Tarsis (hapong- hapo ang mukha)?

Tao 1                : Oo dito nga…

Tao 2                : Pa Tarsis ka rin ba?

Jonas               : (palinga-linga) Hah! Oo… pa Tarsis din ako.

Tao 3                : Sumabay ka na sa amin…

Jonas               : Sige..salamat.

[Biglang may malakas na pagsabog at sunod-sunod na putukan….ang lahat ay nagkagulo…nagsihanapan ng makukublihan…papasok ang mga kasapi ng Big Fish community…tutulungan silang makalabas sa kaguluhang yaon]

EXIT

SCENE 4: Si Jonas sa Big Fish Community. Ang komunidad ay magtitipon sa pang-umagang debosyon.

“Kadakilaan Mo”[1]

Kakilaan Mo, O Dios sinasaysay ng bawat tanawing aking minamasdan,

Kapangyarihan mo sa puso nakintal, kaya magpupuri habang nabubuhay.

Sa hangin at bundok, sa tubig at lupa, sa dagat at batis, sa bawat nilikha,

Kapangyarihan mo doo’y nababadya, kaya’t kagalakan ang magpuring kusa.

O Dios dakila! Dakila kailanman! Puso’y sumisigaw, di ko mapigilan,

Kaligayahan ko ang aking isasaysay, kal’walhatian mo na di mapaparam.

[Tapos ng awit, makikita ang daily routine ng komunidad sa umaga at sa buong araw.]

Papasok si Jonas….

Luz                   : O Jonas! Kumusta ka na? Kumusta na ang iyong pakiramdam?

Jonas               : Nasaan ako? Anong lugar ito?

Greg                 : Nasa sinapupunan ka ng Malaking Isda...isang komunidad. Kami ay mga

  kasapi rito…malayang namumuhay dito. Dati kaming mga alipin at

  bihag ng digmaan…binihag ng Asirya… Tulad mo mga Israelita din

  kami..

Luz                   : Salamat kay Yahweh at ligtas ka na….

Jonas               : (gulat na tugon)Yahweh?

Luz                   : Oo…bakit?

Jonas               : Ahhh..wala po…wala…wala.

Greg                 : Ano ang iyong pakay sa Tarsis?

Jonas               : Hindi sa Tarsis ang punta ko… Tumakas lang ako kay Yahweh… sa

  nagsugo sa akin patungong Ninive.

Luz at Greg       : Ninive!

Greg                 : Lungsod iyon ng Imperyong Asiria…

Jonas               : Lugar na kinasusuklaman ko…bansang kiniiinisan ko…lahing dapat lang

  magunaw at maubos. Silang nag-alipin at nagpahirap sa atin. Ngunit

  hindi ko maintindihan si Yahweh….bakit sinugo niya ako doon.

  Maligtas daw sila at mabago….

Luz                   : Mahabagin si Yahweh….

Jonas               : Pero hindi siya makatarungan!

Luz                   : Ang pag-ibig niya ay hindi lamang para sa atin…kundi laan para sa lahat.

Jonas               : Dapat lang na magunaw sila! Nararapat lamang sa kanila ang parusa ng

  Diyos. Yon ang nais kong gawin ni Yahweh. Wasakin ang mapang-

  aliping bayan na yan!

Greg                 : Isinugo ka hindi dahil sa Asiria…..hindi dahil sa Israel. Ikaw ay lingkod

  niya at propeta hindi dahil sa iyong bayan. Hindi dahil sa mga

  Israelita…kundi dahil sa kay Yahweh. Mayorya din sa kanila ang uring

  biktima ng karahasan at inhustiya sa kanilang bayan. Biktima ng

  teroristang pangangatake ng kanilang estado.

Luz                   : Balita ko…malubha ang karamdamang kinakaharap nila at

  nangangailangan sila ng tulong…hangad din nilang lumaya…katulad

  natin. Marami din tayong mga kababayaan doon…ating mga ka-uri.

Jonas               : (lalakad papalayo sa dalawa….tahimik…nagnilay…makikita ang

                          pagbabago ng posisyon…mukhang nakumbinsi ang mokong!) Noong

                          nasa bingit ako ng kamatayan…ang muntik nang maputol ang aking

  hininga…naalala ko si Yahweh. Ilinigtas niya ako sa pamamagitan

  ninyo… (tatahimik) Tutuparin ko ang kanyang mga sugo.. Kailangan

  kong pumunta sa Ninive.

Luz at Greg       : Ihahatid ka na namin….

Jonas               : Salamat…

EXIT

SCENE 5: Sa Ninive

(Ang mga movers na magpoproject ng kalagayan ay naandoon na…wala pang gagalaw)

Jonas               : Nasaan ang mga tao dito? Patay na yata! Mabuti naman kung

                          ganon. Kahit mangaral ako dito…alam ko matitigas ang ulo nila….hindi

                          rin sila magbabago. At sa gayon…higit nilang mararanasan ang 

  paghuhukom …magugunaw ang bayan na ito!

(Ipakikita sa malikhaing galaw ang kalagayan mayroon sa Ninive)

Jonas               : Magugunaw ang lugar na ito….masisira ang bayang ito. Hanggat

  nananatili ang pagsasamantala! Hanggat nananatili ang

  kasakiman! Hanggat nananatili ang pagkagahaman ng tao sa

  kapangyarihan. Na sa halip na tugunan ang lehitimong hinihingi ng

  kanyang bayan ay dahas ang  isinasagot. Gugunawin ang lugar na ito.  

  Hanggat hindi panghawakan ang pagbabago na kalooban ni Yahweh.

(Pero naroon pa at the back of Jonas’ mind na hindi magbabago ang mga taga-Ninive)

[Si Jonas sa harap ng audience…change mode mula sa pagiging propetang projection]

Jonas               : Ok ba ang linya ko…hindi magbabago ang Ninive. (exit going toward sa audience na proud. O Ano maniniwala ba kayo na mababago? (itatanong sa audience habang naglalalakad) Asus! (Paasar na actuation)

(Subalit sa di niya inaasahang pangyayari…nagbago ang mga tao sa Ninive..bagay na ikinagalit niya kay Yahweh.) [Makikita ng galaw na naglalarawan ng pagsisi ng mga tao ang at pagbabago ng lipunan..aawitin ng komunidad na salitan ang mga sumusunod]

LORD, HEAR OUR PRAYER

A  A  G    F    E    E    G   G F     E     D   D

       Lord, hear our prayer. Lord, hear our prayer

DELIVER US, O LORD

A   A A   A   G A       G   G G   G  F-F E  D

                        De li  ver us, O Lord. De li  ver us, O   Lord

Then fade…

Jonas               : (Papasok) Hindi dapat mangyari ito!!

Yahweh            : (Papasok) Jonas…Ano ang iyong problema?

Jonas               : Alam ko na ikaw ay mahabagin, O Yahweh. Matiyaga, punong-puno ng

                          Pag-ibig at awa. Madaling mapawi ang iyong galit. Ibig ko pang mamatay

                          kaysa mabuhay at nakikita ko kung papaano mo ginawang ligtas ang

  Ninive. Kaysa makitang buhay ang mga tao sa bayang iyan. Mamatay na

  lang sana ako!

Yahweh            : Ano ang iyong ikinagagalit? Ang nais ko sa aking bayan ay maging

  makatarungan sa lahat. Maging daluyan ng paglaya…ibigin ang

  kapwa…ihayag ang Mabuting Balita…yan ang iyong Misyon.  (Going to

  exit with Jonas, habang inaakbayan). Ako ay Ako nga. Ako ay Diyos na

  manlilikha…hindi lang kayo ang concern ko….sila din. Kung papaano

  ang pagpapahalaga ko sa inyo…ganon din sa kanila…

Jonas               : Ang labo mo kasi kung minsan Yahweh….hindi kita maintindihan…

Yahweh            : Buksan mo lang ang iyong puso…imulat mo ang iyong mga mata sa

  kalagayan ng iyong paligid…naandoon ako…nakikipag-uusap…  

  nakikipag-usap sa’yo…tiyak maiintindihan mo…..O aawit na yata

  kayo … pumunta ka na.

Jonas               : Anong ka? Anong ako?…kasama ka doon… di ba? Anong saysay ng

                          awit…anong mensahe…kung di ka namin kasama (may ngiti). God is

  with us.

Yahweh            : O siya…..

EXIT

FINALE : Aawitin ng Choir ang THE MISSION o ng grupo (movers) ang PANANAGUTAN.

Walang sinuman ang nabubuhay para sa sarili lamang,

Walang sinuman ang namamataya para sa sarili lamang.

Koro:

Tayong lahat ay may pananagutan sa isa’t-isa, tayong lahat ay tinipon ng Diyos na kapiling Nya.

Sa ating pagmamahalan ang paglilingkod sa kanino man, Tayo’y itinuring ng Panginoon bilang mga anak. (Koro)

Sabay-sabay na nag-aawitan ang mga bansa, tayo may magdadala ng Balita ng Kaligtasan. (Koro)

TABLEAUX

Lahat: Sa Pangalan ng Ama, ng Anak, at ng Santo Espiritu. Amen.

EXIT

Curtain!

---

[1] Komposisyon ni S.E Ruperto, isinalin sa Filipino ni Dr. Romeo del Rosario, kasalukuyang Pangulo ng Union Theological Seminary.