MGA PAGPIPILIAN SA PAMBUNGAD NA PANALANGIN

1.        +PAMBUNGAD NA PANALANGIN

Tagapanguna: Tayo ay manalangin.

Lahat: Diyos ng Kapayapaan, maging pagkakataon nawa ang aming pagtitipon ngayon upang maranasan ang kapanatagang kaloob Ninyo. Sangkapan niyo po kami ng kakayahang makita Kayo sa aming pang-araw-araw na gawain. Hayaan niyo pong mamuhay kami sa Inyong kapayapaan, sa kay Cristo Jesus na isinilang sa sabsaban. Amen.

2.        +PAMBUNGAD NA PANALANGIN

Tagapanguna: Tayo ay manalangin.

Lahat: O Diyos, tipunin niyo po kami sa gitna ng aming kahirapan. Ipagkaloob Niyo po ang Inyong pangitain tungkol sa aming tunguhin. Kung saan matatamasa ng lahat ang buhay na ganap at kasiya-siya. Hayaan niyo pong mamuhay kami sa Inyong kapayapaan, sa kay Cristo Jesus na isinilang sa sabsaban. Amen.

3.        +PAMBUNGAD NA PANALANGIN

Tagapanguna: Tayo ay manalangin.

Lahat: Pinupuri ka namin, O Diyos, sa iyong pakikipisan. Tinipon mo kami ngayon bilang isang bayan upang higit naming maunawaan ang kahulugan ng pagsilang ni Jesus. Gawin nawang pagkakataon ito na kami ay higit na maliwanagan sa espiritu ng kapakumbabaan. Hayaan niyo pong mamuhay kami sa Inyong kapayapaan, sa kay Cristo Jesus na isinilang sa sabsaban. Amen.

4.        +PAMBUNGAD NA PANALANGIN

Tagapanguna: Tayo ay manalangin.

Lahat: Diyos na Manlilikha, ang lahat dito sa lupa at maging sa langit ay sa iyo. Sa pananambahan namin ngayon, higit ka nawa naming makilala. Hayaan niyo pong mamuhay kami sa Inyong kapayapaan, sa kay Cristo Jesus na isinilang sa sabsaban. Amen.

5.        +PAMBUNGAD NA PANALANGIN

Tagapanguna: Tayo ay manalangin.

Lahat: Naghahari naming Diyos, binubuksan namin ang aming buhay sa katotohanan na iyong kaloob. Mangusap ka nawa sa amin, O Diyos, sa pamamagitan ng sanggol sa Betlehem. Maghari nawa sa amin ngayon ang galak at pag-asa, ang kapanatagan at kalakasan, ang pag-ibig at pagkalinga. Hayaan niyo pong mamuhay kami sa Inyong kapayapaan, sa kay Cristo Jesus na isinilang sa sabsaban. Amen.

6.        +PAMBUNGAD NA PANALANGIN                             

Tagapanguna: Manalangin tayo.

Lahat: O Diyos, na aming magulang, salamat po sa mga biyaya na iyong ibinigay. Sa patuloy Niyong pagtitiwala sa amin, kahit sa kabila ng ilang ulit na ikaw ay nabigo. Sa kabila ng di matapos-tapos na pangako ay patuloy kang nakikipagtipan sa amin. Nawa sa pagkakataong ito, tulungan Mo kami na maisabuhay ang iyong mga katuruan. Hayaan niyo pong mamuhay kami sa Inyong kapayapaan, sa kay Cristo Jesus na isinilang sa sabsaban. Amen.

7.        +PAMBUNGAD NA PANALANGIN

Tagapanguna: Tayo ay manalangin.

Lahat: Diyos na aming Magulang, ginawa mo kaming mga bagong nilikha sa pamamagitan ng iyong Anak na si Jesus, aming Cristo. Patuloy niyo po kaming samahan at patatagin sa paglilingkod at pagpupuri sa Iyo. Hayaan niyo pong mamuhay kami sa Inyong kapayapaan, sa kay Cristo Jesus na isinilang sa sabsaban. Amen.

8.        +PAMBUNGAD NA PANALANGIN

Tagapanguna: Tayo ay manalangin.

Lahat: Diyos na aming Magulang, ang aming pagtitipon ay gawin mo nawang kalugod-lugod sa iyong harapan, at sangkapan kami ng talino’t katatagan. Hayaan niyo pong mamuhay kami sa Inyong kapayapaan, sa kay Cristo Jesus na isinilang sa sabsaban. Amen.

9.        +PAMBUNGAD NA PANALANGIN

Tagapanguna: Tayo ay manalangin.

Lahat: Diyos na aming Magulang, ang dakilang misteryo ng pagsilang ni Jesus sa sabsaban ay mapag-ukulan nawa namin ng pansin sa aming pananambahan. Maipagdiwang nang may di magmamaliw na pag-ibig ang kapanganakan ni Jesus, kasama ng Santo Espiritu. Hayaan niyo pong mamuhay kami sa Inyong kapayapaan, sa kay Cristo Jesus na isinilang sa sabsaban. Amen.

10.     +PAMBUNGAD NA PANALANGIN

Tagapanguna: Tayo ay manalangin.

Lahat: Dios na aming Magulang, sa pagsambang ito ay loobin mong manuot ang Iyong pag-ibig sa amin. Umunlad kami sa pagsunod sa Iyo at pagsasabuhay ng pananampalatayang malaya at mapagpalaya. Hayaan niyo pong mamuhay kami sa Inyong kapayapaan, sa kay Cristo Jesus na isinilang sa sabsaban. Amen.

11.     +PAMBUNGAD NA PANALANGIN

Tagapanguna: Tayo ay manalangin.

Lahat: Sa gitna ng aming mga pagtitiis, dalhin niyo po kami sa inyong liwanag. Maranasan ang galak sa pagiging bahagi ng pangangaral ng Mabuting Balita. Hayaan niyo pong mamuhay kami sa Inyong kapayapaan, sa kay Cristo Jesus na isinilang sa sabsaban. Amen.

12.     +PAMBUNGAD NA PANALANGIN

Tagapanguna: Tayo ay manalangin.

Lahat: Dios na aming Magulang, ngayong malapit na ang Pasko ng Pagsilang ng iyong Anak, kaming mga lingkod mong hindi karapat-dapat ay tangkilikin nawa sa pag-ibig ng iyong Salita na nagkatawang-tao. Manahan nawa sa amin ang Espiritu Santo, ngayon at magpasawalang hanggan. Hayaan niyo pong mamuhay kami sa Inyong kapayapaan, sa kay Cristo Jesus na isinilang sa sabsaban. Amen.

13.     +PAMBUNGAD NA PANALANGIN

Tagapanguna: Tayo ay manalangin.

Lahat:  O aming Diyos, igawad mo nawa sa amin ang kabanalan ng puso; ang pang-unawa sa iyong layunin na di mapipigil ng makasariling hangarin; at hindi mapipigil ng karupukan upang maisakatuparan ang iyong kalooban. Sa iyong liwanag ay mailinaw sa amin ang kahulugan at katuturan ng buhay. Sa iyong habag ay masumpungan nawa namin ang tunay na paglaya, sa kay Cristo Jesus kasama ng Santo Espiritu. Hayaan niyo pong mamuhay kami sa iyong kapayapaan, sa kay Cristo Jesus na nabinyagan sa Ilog Jordan. Amen.

14.     +PAMBUNGAD NA PANALANGIN

Tagapanguna: Tayo ay manalangin.

Lahat: Diyos na aming Magulang, basbasan Niyo po ang pananambahang ito sa Iyong presensya. Sa gayon ay maranasan namin ang tunay na galak at karunungang magdadala sa amin sa Iyong kabanalan. Amen.

15.     +PAMBUNGAD NA PANALANGIN

Tagapanguna: Tayo ay manalangin.

Lahat: O Diyos, sa pananambahang ito, hayaan Niyo po sanang marinig uli ang iyong tawag na binigkas sa amin mula noong kami ay nasa sinapupunan pa lamang. Hanggang sa kami ay mailuwal sa mundong ito. Naging kasama ka namin sa panahon ng kagalakan at tagumpay, at sa panahon ng kalungkutan at pagkabigo. Patuloy mo kaming pinalalakas sa harap ng nakapanlulumong kalagayan. Kung may nangungutya at nanunupil ay naroon ka na nagbibigay kalakasan.                                                               

(Sandaling tumahimik)

Tinig:  “Huwag kang titigil.” “Huwag kang bibitiw.”

Lahat: Aming pinupuri ang iyong katapatan sa lahat ng panahon. Hayaan niyo pong mamuhay kami sa iyong kapayapaan, sa kay Cristo Jesus na nabinyagan sa Ilog Jordan. Amen.

16.     +PAMBUNGAD NA PANALANGIN

Tagapanguna: Tayo ay manalangin.

Lahat: Sa gitna ng aming mga alinlangan, dalhin niyo po kami sa katiyakan. Samahan niyo po kami, O Diyos, nitong aming pananambahang naglalagay sa amin sa pagtuklas ng kahulugan ng buhay. Maranasan nawa namin ang galak sa pagiging bahagi ng pangangaral ng Mabuting Balita. Ipagkaloob niyo nga po ang katapatang sumunod kay Cristo-Jesus. Hayaan niyo pong mamuhay kami sa iyong kapayapaan, sa kay Cristo Jesus na nabinyagan sa Ilog Jordan. Amen.

17.     +PAMBUNGAD NA PANALANGIN

Tagapanguna: Tayo ay manalangin.

Lahat: O aming Diyos, maghari ka nawa sa amin, lalong higit sa pananambahan naming ito. Hayaan niyo pong mamuhay kami sa iyong kapayapaan, sa kay Cristo Jesus na nabinyagan sa Ilog Jordan. Amen.

18.     +PAMBUNGAD NA PANALANGIN

Tagapanguna: Tayo ay manalangin.

Lahat: Diyos na Magulang, loobin Mong maranasan naming ang iyong kabanalan sa pananambahang ito at masangkapan kami ng lakas at dunong sa patuloy na pagpupunyagi upang mabuhay, at maging daluyan ng buhay. Hayaan niyo pong mamuhay kami sa iyong kapayapaan, sa kay Cristo Jesus na nabinyagan sa Ilog Jordan. Amen.

19.     +PAMBUNGAD NA PANALANGIN

Tagapanguna: Tayo ay manalangin.

Lahat: O Diyos, Tagapaglikha ng lahat ng bagay. Mula sa alabok ng mundo hinubog niyo kami, at mula sa abo ng kamatayan inyo kaming itinaas. Sa pamamagitan ng mapagpalayang kapangyarihang nahayag sa krus. Muli niyo po kaming likhain na may malinis na puso at pagharian ng bagong espiritu. Sa gayon ay magkaroon kami ng kakayahang ikumpisal ang aming mga kasalanan. Hayaan niyo pong mamuhay kami sa iyong kapayapaan, sa kay Cristo Jesus na nagdadala sa amin sa isang malalim na pagbubuhay. Amen.

20.     +PAMBUNGAD NA PANALANGIN

Tagapanguna: Tayo ay manalangin.

Lahat: Ipagpatuloy mo nawa, O Diyos, ang iyong paglikha sa aming buhay. Ihinga mo nawa sa amin ang hininga ng buhay at matuto kami sa iyong biyaya. Hayaan niyo pong mamuhay kami sa iyong kapayapaan, sa kay Cristo Jesus na nagdadala sa amin sa isang malalim na pagbubuhay. Amen.

21.     +PAMBUNGAD NA PANALANGIN

Tagapanguna: Tayo ay manalangin.

Lahat: O Diyos ng Pag-ibig, tulungan ninyo po kami na magtiwala sa iyo at yakapin ang iyong mga pangako sa kay Cristo-Jesus kasama ng Santo Epiritu. Hayaan niyo pong mamuhay kami sa iyong kapayapaan, sa kay Cristo Jesus na nagdadala sa amin sa isang malalim na pagbubuhay. Amen.

22.     +PAMBUNGAD NA PANALANGIN

Tagapanguna: Tayo ay manalangin.

Lahat: O aming Diyos, sa lipunang puno ng hinagpis, takot, kasakiman, at pagkagutom sa kabila ng tinataglay na yaman nitong iyong lupang nilikha. Pangunahan niyo po kami, sa kalagayang wala nang magugutom at mauuhaw dahil sa kawalan at kasakiman. Hayaan niyo pong mamuhay kami sa iyong kapayapaan, sa kay Cristo Jesus na nagdadala sa amin sa isang malalim na pagbubuhay. Amen.

23.     +PAMBUNGAD NA PANALANGIN (LINGGO NG PALASPAS)

Tagapanguna: Tayo ay manalangin.

Lahat: O Diyos na aming Magulang na kumakalinga, nagtuturo ng tunay na karunungan upang kami ay mamuhay sa pag-ibig at katuwiran. Dumadalangin kami na iyong kalingain sa gitna ng aming pagkakasadlak sa kahirapan. Sa pagdiriwang namin ngayon sa matagumpay na pagpasok ni Jesus sa Jerusalem, naniniwala kami na yaon ay kapahayagan ng isang matatag at matapat na paninindigan. Ang katotohanan ay hindi kailanman mapipigilan ng kahit anong banta ng kasamaan at kasinungalingan. Gawaran niyo po kami ng sapat na katatagan at katilinuhan upang hindi kami madaya ng kabuktutan. Hayaan niyo pong mamuhay kami sa iyong kapayapaan, sa kay Cristo Jesus na nagdadala sa amin sa isang malalim na pagbubuhay. Amen.

24.     +PAMBUNGAD NA PANALANGIN

Tagapanguna: Tayo ay manalangin.

Lahat: O aming Diyos ng buhay at muling pagkabuhay, sa aming pagdiriwang ngayon ay ipagkaloob mo na mabuhay kami sa pagpapanibagong dulot ng iyong Espiritu. Mailinaw sa amin ang kahulugan ng buhay at ng muling pagkabuhay ng iyong anak na si Jesu-Cristo. Hayaan niyo pong mamuhay kami sa iyong kapayapaan, sa kay Cristo Jesus na nabuhay mula sa mga patay. Amen.

25.     +PAMBUNGAD NA PANALANGIN                                                                         

Tagapanguna: Tayo ay manalangin.

Lahat: O Diyos na aming Magulang, paghariin mo nawa ang iyong di masukat na pag-ibig. Dalhin mo po kami sa kamatayan ng aming pagkamakasarili. Hayaan niyo pong mamuhay kami sa iyong kapayapaan, sa kay Cristo Jesus na kapahayagan ng hindi masukat Mong kapangyarihan. Amen.

26.     +PAMBUNGAD NA PANALANGIN                                                                         

Tagapanguna: Aming Diyos na makapangyarihan sa lahat, narito kami na Iyong mga anak. Nagpapakumbabang lumalapit sa Iyo upang Ikaw ay aming pasalamatan at papupurihan. Patuloy ka nawa naming maparangalan sa aming mga kilos, gawa, pananalita at paglilingkod sa aming kapwa. Hayaan niyo pong mamuhay kami sa iyong kapayapaan, sa kay Cristo Jesus na kapahayagan ng hindi masukat Mong kapangyarihan. Amen.

27.     +PAMBUNGAD NA PANALANGIN                                                                        

Tagapanguna: Tayo ay manalangin.

Lahat: Diyos naming Makapangyarihan, kalugdan mo kami at bigyan ng pagkakataong maranasan ang ibayong pag-asa at pag-ibig. Sa iyong kapangyarihan kami ay mamalaging tatalima nang sa gayon ay maranasan namin ang tunay na kalayaan. Hayaan niyo pong mamuhay kami sa iyong kapayapaan, sa kay Cristo Jesus na kapahayagan ng hindi masukat Mong kapangyarihan. Amen.

28.     +PAMBUNGAD NA PANALANGIN                                                                        

Tagapanguna: Tayo ay manalangin.

Lahat: Diyos na aming Magulang, ibangon niyo po kami sa pagkakadapa at hayaang sumunod sa iyo. Ipagkaloob mo nawa sa amin ang patnubay mong mabiyaya at ang banal na kagalakan upang kaming mga anak mo ay masigasig na maglilingkod sa iyo. Samahan niyo po kami ngayon, O Diyos, at gawing karapat-dapat sa pagpupuri. Hayaan niyo pong mamuhay kami sa iyong kapayapaan, sa kay Cristo Jesus na kapahayagan ng hindi masukat Mong kapangyarihan. Amen.

29.     +PAMBUNGAD NA PANALANGIN                                                                         

Tagapanguna: Tayo ay manalangin.

Lahat: Diyos na aming Magulang, samahan mo nawa ang iyong bayan sa paglilingkod. Patnubayan niyo po kami sa aming pagtitipon ngayon upang itampok ang iyong kabanalan. O aming Diyos, panatilihin niyo po kaming kinalulugdan sa pamamagitan ni Jesu-Cristo kasama ng Santo Espiritu. Hayaan niyo pong mamuhay kami sa iyong kapayapaan, sa kay Cristo Jesus na kapahayagan ng hindi masukat Mong kapangyarihan. Amen.

30.     +PAMBUNGAD NA PANALANGIN                                                                        

Tagapanguna: Manalangin tayo.

Lahat: Makapangyarihan at mahabaging Diyos, sa iyong biyaya at kagandahang loob, kami ay inyong kupkupin. Iligtas sa lahat ng kapahamakan at kami ay ihanda sa lahat ng mga hamon sa buhay. Hayaang kami ay makapaglingkod sa iyo sa pamamagitan ng paglilingkod sa kapwa. Hayaan niyo pong mamuhay kami sa iyong kapayapaan, sa kay Cristo Jesus na kapahayagan ng hindi masukat Mong kapangyarihan. Amen.

31.     +PAMBUNGAD NA PANALANGIN                                                                         

Tagapanguna: Manalangin tayo.

Lahat: O Diyos na Makapangyarihan sa lahat, patuloy niyo po kaming tunghayan lalong higit sa aming paglilingkod at pananambahan. Makamtan nawa namin ang kalayaan at pamana sa piling mo sa pamamagitan ni Jesu-Cristo. Patuloy nawa naming mapagtibay ang pananalig sa iyo. Hayaan niyo pong mamuhay kami sa iyong kapayapaan, sa kay Cristo Jesus na kapahayagan ng hindi masukat Mong kapangyarihan. Amen.

32.     +PAMBUNGAD NA PANALANGIN (LINGGO NG PANDAIGDIGANG KOMUNYON)                                                                         

Tagapanguna: Manalangin tayo.

Lahat: Makapangyarihang Diyos, tinawag mo kami mula sa aming mga natatanging buhay upang makiisa sa iyong katawan. O Diyos, tulungan mo po kami na ang aming mga kaibahan ay mapagyaman sa aming karanasan, sa halip na maghihiwalay sa amin. Ang aming mga kahinaan ay magbuklod sa amin sa halip na sumira sa aming ugnayan. Tulungan niyo po kami, O Diyos, na mapanindigan ang aming layuning makapaglingkod sa halip na paglingkuran. Sa aming pagdiriwang ngayon ng Linggo ng Pandaigdigang Komunyon, O Diyos, samahan niyo po kami. Hayaan niyo pong mamuhay kami sa iyong kapayapaan, sa kay Cristo Jesus na kapahayagan ng hindi masukat Mong kapangyarihan. Amen.

33.     +PAMBUNGAD NA PANALANGIN                                                                          

Tagapanguna: Manalangin tayo.

Lahat: Diyos na makapangyarihan sa lahat, sa pagdiriwang namin ngayon ng Linggo ng mga Layko ay tulungan mo kaming maging matapat sa iyong kalooban. Hayaan niyo pong mamuhay kami sa iyong kapayapaan, sa kay Cristo Jesus na kapahayagan ng hindi masukat Mong kapangyarihan. Amen.

34.     +PAMBUNGAD NA PANALANGIN                                                          

Tagapanguna: Manalangin tayo.

Lahat: Diyos naming Makapangyarihan, sa pananambahan namin ngayon dinggin ang aming mga kahilingan. Ang layuning maipahayag sa aming pananampalataya ang Anak Mong nabuhay mula sa mga patay ang aming pag-asang manabik sa pagkabuhay. Tumibay nawa kami sa paglilingkod sa paraang Iyong kinalulugdan. Hayaan niyo pong mamuhay kami sa iyong kapayapaan, sa kay Cristo Jesus na kapahayagan ng hindi masukat Mong kapangyarihan. Amen.

35.     +PAMBUNGAD NA PANALANGIN                                                                        

Tagapanguna: Manalangin tayo.

Lahat: Diyos na makapangyarihan sa lahat, sa iyong anak na pinakamamahal at hari ng sanlibutan, niloob mong pag-isahin kaming lahat sa iyong kadakilaan. Itulot mong makapaglingkod kaming lahat at makapagpuri sa iyo nang walang humpay. Hayaan niyo pong mamuhay kami sa iyong kapayapaan, sa kay Cristo Jesus na kapahayagan ng hindi masukat Mong kapangyarihan. Amen.

++++++++++++++++++++